BAGUIO CITY – Magagaranen nga agsubli iti aksion iti octagon cage ti agdama a Brave Combat Federation Bantamweight World Champion a ni Stephen “The Kid” Loman manipud iti nalatak a Team Lakay.
Depensaan ti Igorot mixed martial arts champion ti titulona manipud iti challenger a ni Frans “The Black Mamba” Mlambo manipud Ireland iti main event ti Brave 13 a maangay sadiay Belfast, Northern Ireland inton June 9.
Immunan a napangabakan ni Loman ti nasao a bantamweight title iti labanda kenni Guardashan Mangat idi November 2017 ken daytoy ti kaunaan nga Asyano a nagkampeon iti Bahrain-based MMA promotion.
Mangnamnama met daytoy a manayonan pay ti uppat a nagsasaruno a panangabakna iti nasao a promotion iti rematch wenno iti panagsangoda manen kenni Mlambo.
Impannakkelna pay a kaduana a nagsansanay dagiti kakaduana iti Team Lakay ken iti panakabukel ti game plan daytoy.
Immunan nga inabak ni Loman ni Mlambo iti labanda idi September 2016 babaen iti unanimous decision.
Iggem ita ti Team Lakay fighter ti record a 9-2 bayat nga iggem met ni Mlambo ti record a 5-2.