ctto: CTV Edmonton
BAGUIO CITY – Maiproproseso ita dagiti dokumento para iti panakaiyawid ti bangkay ti maysa nga Igorot nga immigrant sadiay Alberta, Canada a pimmusay iti panakauram ti balay dagitoy sadiay.
Nabigbig daytoy a ni Lifter Evasco Casionan, 31-anyos, naasawaan, tubo ti Tublay, Benguet ken residente ti Alberta, Canada.
Sigun kenni Brila Evasco, overseas Filipino worker ken immigrant sadiay Alberta, Canada, nauram ti pagtaengan da Casionan idi December 17.
Kinunana a kabayatan ti panakauram ti bungalow a pagtaengan ti pamilya ket nakaruar amin dagitoy.
Nupay kasta, nagsubli ti biktima iti uneg ngem sadiay a na-suffocate.
Naitaray ti biktima iti pagagasan ngem pimmusay daytoy.
Nagdesisyon ti pamilya a maiyawid ti bangkay sadiay Tublay, Benguet tapnu sadiay a maitabon.
Maibasar met iti report sadiay, kinuna ni Red Deer Royal Canadian Mounted Police (RCMP) Chief Platoon Sheldon Christensen nga iti panagrespondeda iti nasao nga uram ket nasarakanda ti biktima iti living room area ti nasao a balay.
Naamuan a simrek manen ti biktima iti pagtaenganda babaen iti tawa iti basement ti balay.
Naamuan pay a nagbalin a kritikal ti kasasaad ti biktima iti pagagasan sakbay a pimmusay daytoy.
Agarup pito nga indibidual a kameng ti pamilya ti agnanaed iti nasao a balay, pakairamanan ti tallo nga ubbing.
