BAGUIO CITY — Pimmusay ti maysa nga Igorot a mix martial arts fighter kalpasan a naaksidente daytoy sadiay Romulo Drive, Lualhati Barangay, Baguio City idi parbangon
Nabigbig daytoy a ni Lucky Amor Mateo, 27-anyos, baro, martial arts instructor ken MMA fighter ken resident ti Tuding, Itogon, Benguet.
Maibasar iti report, paawid ti biktima a nakamotorsiklo kagiddanna ti naka-motorsiklo metlaeng a kasinsinna idi simrekda iti one-way-lane a kalsada sadiay Romulo Drive.
Nangun-una iti nasao a kalsada ti biktima ken killaat a simrek daytoy iti kakalkali a kalsada ken sadiay nga aksidente a naidungpar ti motorsiklo iti nakali a daga.
Intaray daytoy ti kasinsinna iti pagagasan ngem pimmusay ti biktima bayat ti panangispalda iti daytoy.
Naamuan a ni Mateo ket addaan iti birngas a “Furious” ken addaan iti professional record nga uppat a panangabak ken awanan panaka-abak ken ibagbagina ti Fight Corps MMA iti Baguio City.
Naudi a limmaban daytoy idi napalabas a march 23 iti URCC: BETS 5 sadiay Manila ken ditoy nga inabakna ni Kevin Park babaen iti knock out iti maikadua a rikos.
Sigun iti online MMA network a Tapology, ni Mateo ti maika-walo kadagiti 181 nga active Southeast Asia Professional Flyweights.
