[photo ctto FloRhenz Dante Martes]
BAGUIO CITY – Agkidkiddaw iti tulong ti pamilya ti maysa a Pilipina kalpasan a na-comatose ken pimmusay daytoy sadiay Gwangju, South Korea.
Sigun kenni FloRhenz Dante Martes, maysa a factory worker sadiay, idi February 22 ket nagbakbakwar ken naulaw ni Jane Diclas Botay manipud Kibungan, Benguet a maysa metlaeng a factory worker sadiay SoKor.
Nupay kasta, iti panangitarayda iti daytoy iti pagagasan ket naduktalan a nagsagaba ti Pinay iti raptured veins ken aneurysm ken naamuan a saanen a maagasan daytoy.
Sigun kenni Martes, na-stress ni Botay gapu iti nakaro a panagdandanag daytoy gaputa naamuan a TNT daytoy ken adda ti issue nga adda ti mangipakemmeg kadagiti TNT sadiay.
Innayonna a na-brain dead ni Botay sakbay a pimmusay daytoy.
Naamuan iti doktor nga uray no agballigi ti operasyon ket agbalin ti Pinay a paralisado ken maysa agingga tallo laengen a bulan ti ipautna malaksid a bassit unay ti posibilidad a makalasat daytoy.
Gapu iti nasao a rason, nagdesisyon ti pamilya ti Pinay nga urayenda laengen ti ipupusay daytoy.
Naamuan a nasurok dua a tawen nga agtatrabaho ti nasao a kailyan sadiay South Korea, kaduana ti asawana.
Asinoman a mangkayat a mangipaay iti pinansial a tulong para kenni Mrs. Jane Botay, mabalin nga ikontak ni FloRhenz Martes iti numero a 010-2991-6885 wenno iti asawa ti kailyan iti 010-2116-5918 wenno ikontak dagitoy babaen iti Facebook account ni Martes.
