LA TRINIDAD, BENGUET – Binisita ni Jeanalynne Bawayan-Refraction ti tanem ti kabsatna a daydi PCol. Michael Bawayan, Jr. idiay Pyramid Memorial Park, Buyagan, La Trinidad, Benguet itay agsapa.
Karaman kadagiti bimmisita iti tanem ti Igorot cop ket ti bayawna agsipud ta saan a makasang-at ti asawana nga adda ita idiay Zamboanga.
Nupay tallo a tawenen ti napalabas, masayangan latta ni Jeanalynne kadagiti accomplishments a mabalin pay koma a magun-od ti kabsatna nu sibibiag agingga iti agdama.
Maipalagip a pimmusay daydi PCol. Bawayan Jr. idi Agosto 6, 2021 kalpasan a pinaltugan ti padana a pulis idiay Jolo, Sulu.
Manarimaan idi ti checkpoint operation idiay Barangay Asturias, Jolo, Sulu idi sinitar ni PCol. Bawayan ti subordinate-na a ni Staff Sgt. Emran Jilah gapu iti attidog a buokna.
Gandaten koma ni PCol. Bawayan a putden ti buok ni Jilah usar ti kartib kas maibasar iti regulasyon dagitoy.
Nupay kasta, ditoy a pinalpaltugan ni Jilah ti superior-na a ni Bawayan Jr. nga idi ket provincial police chief ti Sulu PNP.
Bimmales met dagiti security aides ti Cordilleran police ken pinaltoganda ni Jilah a nagresulta iti dagus nga ipupusay daytoy.
Naitabon ni PCol. Bawayan idiay Pyramid Memorial Park, Buyagan, La Trinidad idi Agosto 14, 2021.
Isuna ket tubo ti Sagada, Mt Province ken residente ti Baguio City.
