BAGUIO CITY – Nadutukan kas baro a dadaulo ti Regional Mobile Force Battalion (RMFB) ti National Capital Region Police Office (NCRPO) ti maysa a police officer manipud Bokod, Benguet.
Nadutukan ni Police Colonel Lambert Alban Suerte kas baro a commander ti RMFB ti NCRPO idi napalabas a bulan.
Mangnamnama met dagiti personnel ti NCRPO-RMFB nga agbalin ni Suerte a nasayaat a lider kadagitoy.
Maipalagip a sakbay ti baro a destinona ket nagserbi ni Suerte kas force commander ti RMFB sadiay Calabarzon.
Mabigbigbig met daytoy iti regional level ken national level gapu iti dedikasyonna iti serbisyo ken naka-awat daytoy iti adun a pammigbig wenno pammadayaw gapu kadagiti balligina iti police operations.
Maibasar iti rekord, karaman ni Suerte kadagiti lima a commanders ti Special Action Force a napadayawan gapu iti panangidauloda iti militar iti panakawayawaya ti Marawi City manipud iti ikot dagiti terorista.
