BAGUIO CITY – Pinagyamanan ni Asian Circuit Queen Sandi Menchi Catlona Abahan dagiti amin a timmulong kenkuana tapnu nabaelanna a nakipaset iti Ultra Trail du Mont-Blanc (UTMB) 2017 sadiay Alps of France, Italy ken Switzerland idi napalabas a lawas.
Nakipaset ti bemedalled trail runner manipud Baguio City iti kategorya ti Sur les Traces des Ducs de Savoie nga addaan kaatiddog a 120 kilometers ken nagleppas daytoy iti maika-9 a pwesto iti age category dagitoy ken maika-21 a pwesto iti female category.
Iti panakipatang ti Bombo Radyo kenni Abahan, imbingayna a ti UTMB ti kadakkelan a trail race iti sangalubongan ken maikonkonsidera a world cup dagiti trail runners.
Innayonna a nagduduma a qualifying events ti pinasetanna kas iti Clark-Miyamit Falls Ultra Marathon ken ti trail run sadiay Hong Kong ken ditoy Pilipinas babaen iti maysa a latak nga sports brand.
Sigun kenkuana, bayat ti panagkalay-at ken panagtarayna kadagiti bantay ti tallo a pagilian ket imetna ti agarup tallo a kilo a mandatory gears daytoy kas iti jacket, gloves, taraon, silaw, danum ken dadduma pay.
Impeksana met ti panagyamanna kadagiti amin a timmulong kenkuana tapnu nakapaset ken naibagina ti Pilipinas iti nasao a pasalip, nangruna dagiti gagayyem ken kakaduana a trail runners.
Dinakamatna a ti nasao a banag ti nagbalin a bilegna tapnu nalpasna ti nasao a pataray.
Ni Abahan ket tubo ti Barlig, Mt. Province ken Ifugao nupay naipasngay ken dimmakkel ditoy siudad ti Baguio.
