BAGUIO CITY – Maysa manen a Cordilleran soldier ti pimmusay iti agtultuloy pay laeng a riribok sadiay Marawi City.
Nabigbig daytoy a ni Scout Ranger Nelson Lasang Wailan a taga Tabuk City, Kalinga ken rambakanna kuma ti maikatallopulo ket innem a kasangayna inton Agusto 27.
Iti inisyal nga impormasyon a nakalap ti Bombo Radyo Baguio, simrek iti maysa a pasdek sadiay Marawi City ti grupo da Wailan idi pinalpaltogan dagitoy dagiti kalaban a nangitunda iti ipupusay daytoy ken ti maysa pay a soldado.
Iti met panakiuman ti Bombo Radyo iti kabsat daytoy a ni Madonna Lasang Wailan nga agtatrabaho ita sadiay Taiwan, kinunana a saanna a ninamnama ti napasamak iti kabsat dagitoy.
Inladawanna daytoy a naanus, naayat, nagaget ken responsable a kabsat gaputa un-unaenna pay ti pagsayaatan ti pamilyana sakbay ti bukodna a bagi.
Ni Wailan ti maikadua kadagiti sangapulo ket maysa nga agkakabsat, ken sangapulo ket tallo a tawennan iti serbisyo.
