BAGUIO CITY – Agingga ita ket arigna saan pay laeng a mamati ti Igorota a muay thai world champion iti panagballigina iti kaunaan a gundaway a panakipasetna iti SEA Games.
Nagun-od ti 19-anyos a ni Islay Erika Bomogao ti silver medal iti 45kgs female division ti muay thai a maysa kadagiti combative sports ti 2019 SEA Games.
Naipaay pay kenkuana ti special award kas SEA Games Muay Thai Rising Star.
Iti interview ti Bombo Radyo-Baguio, kinuna ni Bomogao nga arigna saan daytoy a makaturog a naimbag iti rabii gapu iti nalaus a ragsakna iti balligi a nagun-odna.
Inlawlawagna a daytoy ket gaputa sabali ti rikna ti agay-ayam iti sangwanan dagiti padana a Pilipino.
Dinakamat ti balasang a dua a tawen a nagsagana daytoy para iti umuna a gundaway a panakipasetna iti SEA Games ken nagensayo pay daytoy sadiay Thailand.
Impanakkel pay ti Igorota athlete nga agtaltalinaed ti nangato a grado daytoy iti pagadalan uray tuttutukanna ti panagensayona kas maysa nga atleta.
Innayon ni Bomogao a nasursuruna iti umuna a gundawayna iti SEA Games ti nakaro a hardwork ken panangmintinir iti kumpiansa iti bagi.
