BAGUIO CITY – Dagus nga ak-aksionan ti lokal a gobyerno ken dagiti otoridad sadiay La Trinidad, Benguet ti aniaman a report iti iligal nga aktibidad iti Puguis Communal Forest a masarakan iti masakupan ti munisipyo.
Iti panakiuman ti Bombo Radyo Baguio, imbinglay ni Mayor Romeo Salda a dagus a nagresponde ken rinakrak dagiti personnel ti La Trinidad LGU, pulis ken DENR dagiti kongkreto a poste ken barb wires nga iligal a naiyaramid iti Puguis Communal Forest.
Dinakamatna a naisayangkat ti aktibidad idi inreport kenkuana dagiti forest rangers seknan iti grupo dagiti inidibidual a mangimunmuntar ti kongkreto a poste ken barb wires iti viewdeck ti communal forest.
Kinunana nga impasardeng dagiti rangers ti nasao a grupo a bukbuklen ti nasurok 30 a tattao ngem nagkedked dagitoy.
Gapu iti daytoy, kidkiddawenna manen ti saanen a panakitransaksion ti publiko kadagiti saan a legal a mangilaklako kadagiti lote iti masakupan ti nasao a kabambantayan.
Kabayatanna, addan ti pinirmaan ni Mayor Salda nga stoppage order a mangibilbilin iti saanen a panangituloy ti Pines City Doctor’s Hospital iti panag-aladda iti kalsada a sumang-at iti Upper Cogcoga sadiay Pico, La Trinidad.
Sigun kenkuana, nakaawat daytoy ti impormasyon a ti disso ti konstruksion ket addaan ti dua a titulo para iti nasao a road right of way isut gapuna a saan a rumbeng ti panang-alad ti ospital iti daytoy.
