BAGUIO CITY – Nadangran ti 25-anyos a lalaki, maysa a security guard ken residente ti San Vicente, Baguio City kalpasan a pinaltogan ti 44-anyos a lalaki ti kannigid a luppo daytoy idi Marso 5, iti agdama a tawen.
Maibasar iti imbestigasyon, nabigbig ti suspek a miyembro ti Armed Forces of the Philippines a residente ti Victoria, Tarlac.
Kalpasan ti nabayag a panawen a naiyadayo daytoy iti pamilyana ket nagawid iti asawana nu sadino ti renrentaan ti biktima ti nagturongan dagitoy.
Bayat ti kaadda ti suspek ken ti asawana iti nasao nga apartment, simmangpet ti biktima ken impilitna a sinumrek.
Pinadas met a pakalmaen ken lapdan ti suspek ti biktima ngem binettakna ti glass window rason a nakastrek daytoy iti apartmentna.
Gapu iti dayta, napasamak ti insidente ti pammaltog nu sadino agparparang a saan nga ammo ti suspek nga adda ti relasyon ti asawa daytoy ken ti security guard.
Dagus met a rimmesponde ti kameng ti pulisya a nangitunda iti panakaarestar ti suspek.
Malaksid iti dayta, nakumpiskar ti Caliber 45 pistol armscor manipod iti suspek nga addaan ti magazine ken uppat a live ammunition.
Narekober metlaeng ti fire cartridge cage iti nakapasamakan ti nasao nga insidente.//Bombo Jez Lapizar
