BAGUIO CITY – Ur-urayen paylaeng ti Department of the Interior and Local Government (DILG) – Baguio ti panangaprobar ti Sangguniang Panlungsod iti insumitirda nga imbentaryo kadagiti nabigbig a mabalin a maaramid a paradaan dagiti pribado a lugan kadagiti babbarangay ti siudad tapnu maliklikan ti iligal a panagparada dagitoy kadagiti kalsada.
Sigun kenni DILG-Baguio City Director Evelyn Trinidad, inaramid ti pulisya ti imbentaryo kas maitunos iti pammilin ni Mayor Benjamin Magalong ken imberipikar dagitoy ti City Engineering Office.
Dinakamatna a 67 manipod kadagiti 127 barangay ti Baguio ti addaan ti nawaya nga espasyo a mabalin a mapagbalin kas one-side parking.
Sigun kenkuana, bayat a saan pay a naka-schedule iti deliberasyon ti lokal a konseho ket isingsingasingda ti panangbukel dagiti barangay council iti ordinansa seknan iti daytoy.
Innayonna a kadagiti met barangay nga awanan ti nalawa nga espasyo a mapagbalin a paradaan ket mabalin a makisarita dagiti barangay officials kadagiti addaan ti pribado a lote para iti nasao a panggep.