BAGUIO CITY — Agtultuloy ti imbestigasyon ti Pasil Municipal Police Station iti maatap a kaso ti panakakidnap wenno panakakawtibo iti maysa nga onse-anyos a lalaki sadiay Pasil, Kalinga idi kanikadua.
Nabigbig dagiti suspek a da John Rey Pedrosa manipud Laguna, Michael Perilla manipud Oriental Mindoro ken Ronald Melanis manipud Sorsogon.
Nabigbig met ti biktima a ni Bryner Silagan, estudyante ti Grade 6 ken residente ti Balinciagao Norte, Pasil, Kalinga.
Sigun kenni PSI Willie Dubanse, hepe ti Pasil PNP, pinaglibakan dagiti tallo a suspek ti akusasyon ti pamilya ti biktima a ginandatda a kinawtibo ti nasao nga ubbing.
Inlawlawagna a maibasar iti salaysay ti ubbing, ingeman dagiti suspek ti takyagna ken innaputda ti ngiwatna ngem saanda a ginandat nga iserrek daytoy iti 6-wheeler container van truck dagitoy.
Kinunana nga al-alaenda met laeng ti nalawag a salaysay ti testigo a kadwa ti ubing.
Naamuan a dagiti maitudtudo ket agidel-deliver kadagiti piyesa ti maysa a telecommunications company.
