Manamnama a lawlawagan ni National Bureau of Investigation (NBI) Director Melvin Matibag ti imbestigasionda iti maatap a panagpangta ni Vice President Sara Duterte kontra kenni President Ferdinand “Bongbong” Marcos Jr., First lady Liza Araneta-Marcos ken sigud a House speaker Martin Romualdez.
Manamnama a malawlawagan daytoy iti panag-testigona iti impeachment court intun Martes, July 21.
Sigun kenni Atty. Benjamin Tolosa, manamnama nga ibutaktak ni Direc. Matibag dagiti impormasyon a saan nga inwaragawag dagiti immuna a kameng ti NBI a nagtestigo gapu iti limitado a sakop ti trabaho dagitoy.
Innayon ni Atty. Tolosa a ni Matibag ti makailawlawag mainaig iti nainget nga imbestigasyon ti NBI seknan iti “Hitman” a maatap a kinontrata ni VP Sara Duterte.
Impetteng ni Atty. Tolosa a ti maatap a panagpangta ti bise presedente ket suportado metlaeng ti mismo nga insawangna ken ti saanna a panangibabawi iti maatap a pangta daytoy.
Inlawlawag ti nasao nga abogado a naipaayan ni VP Sara iti tallo nga aldaw tapno ibabawina ti maatap a panagpangta daytoy.
Nupay kasta, saan nga imbabawi ti bise presidente ken inkalinteganna pay nga awan ti criminal act ti panagibales no pimmusayen ti maysa a tao.
