Nakaruaren iti ospital ti mapapati a biktima iti naisayangkat nga illegal Fishing idiay Amburayan River, Barangay Taba-ao, Kapangan Benguet.
Ti nasao nga biktima ket residente metlaeng iti nasao a Barangay.
Iti interview ti Bombo Radyo kenni Police Major Leonardo Buya, Acting Chief of Police iti Kapangan Municipal Police Station nakaawatda iti tawag iti parbangon ti April 17, 2025.
Naawatda ti impormasion a maysa nga indibidual ti nakapasar iti pannakaulaw kalpasan a nangalap daytoy iti ikkan iti nasao a karayan.
Maibasar iti imbistigasion dagiti otoridad, nagturong ti biktima iti nasao a karayan tapno agkalap iti ikkan.
Nupay kasta, naobserbaranna a sabali ti raman ti danum.
Malaksid iti dayta, nakarikna pay daytoy iti pannakaulaw ken panagsarwa.
Nagkiddaw met daytoy iti tulong isu’t gapuna a dagus a naipakaammo kadagiti otoridad.
Dagus met a nagresponde ti Kapangan Municipal Police Station ken idiayda a nadanunan ti dua nga indibidual nga addaan iti Sodium Cyanide kasta met dagiti natiliwanda nga ikkan.
Impetteng ni PMaj. Buya nga iligal ti agusar iti makasabidong a kemikal iti panagkalap sadiay Amburayan.
Gapu iti kasta, posible a mapilaan dagiti suspek a residente metlaeng iti nasao a lugar iti kaso.
Iti kanito a mapaneknekan a naglabsing dagitoy iti pagalagadan, posible a mapilaanda iti kaso nga “illegal fishing by the use of poisonous substance”.
Iti agdama, ad-adalen ti biktima no pilaanna iti kaso dagiti suspek.
Nupay kasta, no saan a mangipila ti biktima iti kaso kontra kadagiti suspek, kinuna ni Police Major Buya a ti kapulisan ti mangipila iti kaso gapu iti inaramid dagitoy nga iligal a panagkalap.
Iti agdama, napalubusan dagiti dua a suspek bayat a maur-uray ti pannakasukimat dagiti ikkan a nakompiskar kadakuada tapno maduktalan no ti rason iti panagtiliw dagitoy ket gapu iti Sodium Cyanide.//mp4
