BAGUIO CITY–Agtultuloy ti panangimbestigar ti Commission on Human Rights – Cordillera iti panakapapatay daydi Ricardo Mayumi, maysa a kameng ti progresibo a grupo sadiay Kiangan, Ifugao idi napalabas a March 2 ti agdama a tawen.
Sigun kenni Bienvenido Reaño, Special Investigator IV ti ahensia, nagturongda sadiay Ifugao ken nangimbestigarda iti las-ud ti dua nga aldaw.
Kinunana a naamoanda a ni Mayumi ket miyembro ti Ifugao Peasant Movement a maysa a progresibo nga organisasyon ken daytoy ket maysa met laeng nga environmental activist.
Maibasar iti panakiyumanda kenni Ben Calingayan a katrabahoan ni Mayumi iti nasao nga organisasyon, naamuan a ni Mayumi ket tubo ti Binablayan, Tinoc ngem gapu iti naaw-awat daytoy a pangta iti biyag ket immakar daytoy sadiay Kiangan, Ifugao.
Kinunana a tubtubngaren ni Mayumi iti mapanplano a panakaipasdek ti mini-hyro project sadiay Tinoc gaputa maapektaran dagiti pagmulaanda sadiay.
Napapatay ti biktima iti impasdekna a kalapaw sadiay Kiangan idi iti rabii ti March 2 kalpasan a namin adu a daras a napalpaltogan daytoy.
Sigun kadagiti kaaruba ti biktima, nangngegda nga adda ti kasasao daytoy sakbay a napasamak ti insidente.
Napapatay ti aktibista lima a metro manipud iti kalapawna isut gapuna a mapapati a ginandatna ti aglibas ngem naideklara a dead on arrival idi naitaray daytoy iti pagagasan.
Impetteng ni Reaño a ti kaso ket nalawag a panaglabsing iti karbengan nga agbiag isut gapuna a kasapulan laeng a makemmeg dagiti suspek.
