BAGUIO CITY-Umap-apela ti pulisya kadagiti kabagian ti babai a nanggandat nga pagkamatay iti uneg ti maysa a hotel sadiay Lower Session Road, siudad ti Baguio idi kanikadua.
Sigun iti Station 7 ti Baguio City Police Office, nabigbig laeng ti nasao a babai iti nagan a “Wilma Ona” kas maibasar iti rekord ti hotel ken awan ti dadduma a detalye iti pakabigbigan daytoy.
Immunan a naipadamag nga agmamaysa ti nasao a babai a nagcheck-in iti hotel iti malem ti July 13 ken saanen a nakita dagiti staff a rimrimuar iti silidna.
Nagcheck-out ti babai idi agsapa ti July 14 ken ditoy a nakita ti front desk officer nga adda dagiti sugat iti karabukob ken takyagna malaksid pay a daradara ti ima ken bado daytoy.
Dagusda nga intaray ti babae iti pagagasan sakbayda a nagkiddaw iti tulong ti pulisya.
Nakarekober pay ti pulisya iti dua a blade manipud iti silid ti babai a mapapati nga inaramatna a nangsugat iti tengnged daytoy bayat nga awan met ti nakitada iti CCTV footage a dadduma a simsimrek iti nasao a silid.
Naamuan met a nagsagrap ti babae iti dunor iti anterior neck ken ima daytoy isut gapuna nga agingga ita ket saan pay a makapagsao ken makapagsurat.
Ur-urayen met ti pulisya dagiti makiaam-ammo wenno kabagian ti nasao a babai tapnu imbestigaranda ti kangrunaan a rason iti napaay a panagkettel daytoy iti biag.
