BAGUIO CITY – Agtultuloy ti imbestigasyon ti Baguio City Police Office maipapan iti pakabigbigan dagiti indibidual a nangibati kadagiti maladaga idiay Melvin Jones ken Baguio City Cathedral idi Marso katorse.
Sigun kenni PCapt. Angeline Dongpaen, pannakangiwat ti Baguio City Police Office, adda dagiti CCTV footage kadagiti nakapasamakan ti insidente ken maiyur-uray laengen ti update manipod iti Women and Children Protection Desk maipapan kadagitoy.
Maibasar iti CCTV footage ti Baguio City Cathedral, nakita ti babae ken lalaki a nangibati iti maladaga 20 minutos sakbay a masarakan dagiti witness daytoy.
Bayat a nasarakan met ti cleaning staff ti fetus iti comfort room idiay Melvin Jones.
Dagus met a nakikoordinar dagitoy iti Legarda Barangay para iti panakaitabon ti fetus a mapatta-patta a damanon iti tallo agingga uppat a bulan.
Innayon pay ni PCapt. Dongpaen a karit kadakuada ti panangsapol iti pakabigbigan dagiti indibidual a nangibati kadagiti maladaga.//Bombo Jez Lapizar
