BAGUIO CITY- Maiyawid ditoy Baguio City ti bangkay ti maysa a negosyante a pimmusay iti pammaltog sadiay Talogtog, Dolores, Abra idi rabii.
Nabigbig daytoy a ni Arturo Santiago Miranda Jr. 40-anyos.
Maibasar iti report, napasamak ti pammaltog iti sangwanan ti farm supply a tagikua ni Miranda Jr. a nakasagrapan ti ulona iti tama ti bala ti paltog bayat a natamaan iti stray bullet ti maysa a menor de edad.
Naamuan a dead on arrival iti ospital ti negosyante bayat a nakaruar metten iti ospital ti menor de edad.
Nupay kasta, idi agsapa ket nakita laengen iti sirok ti rangtay sadiay Mudiit, Dolores, Abra ti bangkay ti suspek a ni Cesar Damian, 70-anyos, retirado nga empleyado ti DPWH.
Maatap a nagbekkel ni Damian ken patien pay ti pulisya a posible a pinaltoganna ti ulona gapu iti nakita a tama ti bala ti paltog iti ulo daytoy.
Nadiskobre iti nasao a disso ti paltog a caliber 38 ken maysa a motorsiklo.
Iti met interview ti Bombo Radyo Baguio, kinuna ni PCpl. Jimson Belisario, imbestigador ti Dolores Municipal Police Station a nakakitada pay iti suicide note manipod iti suspek.
Dinakamatna a posible a personal ti motibo iti panangpaltog ti suspek iti biktima.
Naamuan pay a ti suspek ket maysa kadagiti kustomer a gumatgatang ti manok iti farm supply ti biktima.
