BAGUIO CITY – Makidkiddaw ti panangimbestigar ken panangipatungpal ti Department of Public Works and Highways (DPWH) – City District Engineering Office iti paset ti Bokawkan wenno Buhagan Road a kadaywan a pakapasapasamakan dagiti vehicular accidents.
Nailanad daytoy iti resolusyon nga inaprobaran ken impasa ti lokal a konseho ti siudad ti Baguio.
Sigun kenni Councilor Benny Bomogao, babaen iti daytoy ket agaramidda iti solusyon tapno maliklikan dagiti agsasaruno nga aksidente a pakadangdangranan ti publiko ken pannakadadael ti sanikua.
Kinunana nga adda met dagiti mabukel nga addang kas iti posible a pakaipatungpal ti rerouting ken pannakibangon ti impact zone.
Dinakamatna a kasapulan a mangipatungpalda iti panagadal no kasapulan ti rerouting kas iti panagdalyasat ti lugan iti paset ti Ferguzon, Magsaysay wenno iti M. Roxas Road.
Kabayatanna, kinuna ni Bomogao nga inton Mayo 30 ket mangipatungpalda iti konsultation kadwada ti DPWH-City District Engineering Office mainaig met laeng iti nasao a pakaseknan.