Insingasing ni Baguio City Councilor Jose Molintas a masapol a maikonsulta iti national level ti dagiti labor issues maipapan iti management ti Food Panda, maysa kadagiti kalatakan a food delivery services iti pagilian.
Kasaruno dayta ti naduktalan nga awanan daytoy ti physical office iti siudad ti Baguio ken awanen ti bisa ti business permitna a nag-expire idi pay March 29, 2023.
Sigun iti maysa kadagiti nangibagi kadagiti riders iti naangay a forum ti city council a ni John Jay Chan,maiprosproseso online amin a kasapulan a maiproseso iti operasyon dagitoy pakairamanan ti deployment, application processing, ken payment reception.
Impetteng met ni Councilor Lourdes Tabanda a ti kinawan ti opisina ken supervisor ti maysa a kompanya ket mangipakpakita ti nakapsot nga employer-employee relationship.
Malaksid iti dayta,kinuna ni Tabanda a maysa a panaglabsing ti kinaawan ti business permit ti Food Panda nga agingga iti agdama ket agop-operate paylaeng iti siudad.
Nupay kasta, imbinglay met ni Allan Abayao, dadaulo ti Permits and Licensing Division nga insingasingna a mangala lattan dagiti riders ti individual business permitsda kalpasan a nag-expire ti permit ti kompanya a pagpapaayanda tapno makapagtuloy latta a ligal ti operasyonda.
Maipalagip a nangrugi ti panagimbestigar ti City Council iti nasao a pakaseknan kasaruno ti panang-akusar dagiti riders iti maseknan a kompanya a saan nga agtultulnog daytoy iti labor code nu sadino, nababa ti fare rates, awan ti safety items a maipapaay para kadagiti riders, kasta met nga awan ti insurance.
Malaksid iti dayta,naobserbaran a kadawyan kadagiti platform companies kas iti Food Panda ket ibilbilangda nga independent contractors dagiti empleydo dagitoy tapno maliklikanda ti mangipaay kdagiti benepisyo.
Iti baet ti sitwasyon dagiti riders, saana latta a kabaelan dagitoy ti mangipatungpal ti bsolute work stoppage kas panangprotesta gapu ta adu kadakuada ti kasapulanna ti mangged.
