BAGUIO CITY- Maipangruna dagiti residente iti sector ti immunocompromised nga indibidual ti panagbakuna ti 2nd dose ti booster shots ti bakuna kontra COVID-19 iti Baguio City.
Iti interview ti Bombo Radyo Baguio kenni CHSO Chief Dra. Rowena Galpo, kinunana a nairaman ti siudad kadagiti napalaubosanen nga agbakuna ti maikapat nga dose ti bakuna wenno maikadua nga dose ti booster shots.
Inlawlawagna met a maipangruna dagiti indibidual nga addaan iti immunodeficiency, active cancer patients, HIV patients, transplant recepients , bedridden ken dadduma pay.
Iyaw-awisda ti maangay a panagbakuna iti nasao nga sektor a maiyuswat iti kadakellan a mall iti siduad.
Mainaig iti dayta, dumanonen iti 40% kadagiti adults ti nakaawaten ti booster shots ti bakuna.
Inyunay-unayna met ti kinapateg a mabakunaan ti booster shots tapnu saan a bumaba ti kina-epektibo ti bakuna.
Inaklonna met a kinakurang ti umno nga impormasyon ti kangrunaan a rason ti nababa a datus wenno bilang dagiti immawaten ti booster dose.
