Dakkel a tulong para iti Benguet Electric Cooperative (BENECO) ti impaiyulog ni Baguio City Mayor Benjamin Magalong a pammilin a mangimanmandato kadagiti public utility companies partikular dagiti telecommunication ken cable companies iti panangisimpa dagitoy kadagiti cable wiresda sakbay nga agleppas ti tallo a lawas a pawayway dagitoy.
Iti panakiuman ti Bombo Radyo kenni Laarni Ilagan, ti Community Relation Associate iti Benguet Electric Cooperative, maysa kadagiti makitkitada a rason kadagiti mapaspasamak nga unscheduled power interruption ti panakahook dagiti kable ti telecommunication companies kadagiti dadakkel a truck a makaituntunda iti panakaguyod met dagiti linya wenno poste iti BENECO.
Sigun kenni Ilagan, saan a nagkurang dagitoy a palagipan dagiti maseknan nga indibidwal kadagiti public utility companies nga isimpada dagiti kableda nu sadino, maipakpakaammo kadakuada dagiti scheduled power interruption iti BENECO tapno maaddaan dagitoy iti gundaway a makigiddan ken mangisimpa kadagiti masapol nga isimpa a linya dagiti kableda.
Kagiddan dayta, impeksa ni Ilagan a ti nasao nga electric cooperative ti masansan ken otomatiko a pabasulen ti publiko tunggal adda ti mapasamak nga unscheduled interuption.
Gapu iti dayta, mangnamnama ti nasao nga opisyal iti panagtulnog dagiti telecommunication ken cable companies iti naimandato kadakuada.//Bombo Rob Dominguez
