Naituding nga agbobotos ita nga aldaw dagiti kameng ti National Assembly idiay South Korea para iti impeachment complaint kontra kenni South Korean President Yoon Suk Yeoul.
Daytoy ket kasaruno ti panangideklarana ti emergency martial law idi laeng Miyerkules, Disiembre a kuatro nu sadinno, adu dagiti nakapungtot ken nangbabalaw iti deklarasionna.
Iti pannakiuman ti Bombo Radyo kenni Roel Toquero, Bombo International News Correspondent idiay South Korea, kinunana a daytoy ket gaputa awan paylaeng gamin dagiti rason ni President Yoon Suk Yeoul nu apay a nangideklara daytoy iti martial law a kidkiddawen dagiti oposision ken umili idiay South Korea.
Sigun met kadagiti sumagmamano a kameng ti National Assembly, kayatda a maikkat iti takem ti nasao a presidente tapno masalakniban ti pagilian a South Korea ken dagiti tattao sadiay.
Patien pay dagiti sumagmamano a kameng ti National Assembly a mabalin a maulit ti nalabes nga aramid ti presidente a kas ti panangideklarana ti martial law, a mangikabil iti South Korea ken dagiti umili iti nakaro a peggad.
Karaman kadagiti agbotos iti impeachment complaint ket ti dadaulo ti ruling party ti National Assembly wenno ti People Power Party.
Manamnama a tumulong dagitoy iti panangpapanaw iti puesto ni President Suk Yeok iti kanito nga awan pay dagiti rasonna iti panangideklarana iti martial law.
Maibasar iti datos, dumanon iti pakabuklan a tallo gasut a kameng ti National Assembly nu sadinno, 192 ti adda iti opposition block wenno administration block.
Kas nailanad iti linteg, kasapulan laeng ti dua gasut wenno two-thirds tapno maipasa ti impeachment complaint kontra iti presidente.
Kabayatanna, immunan a nangisayangkat dagiti nagduduma a sektor manipod iti nagduduma a probinsia ti South Korea ti panagprotesta kontra iti nasao a presidente.
Karaman kadagitoy ti uppat a main cities a kas ti Seoul, Busan, Daegu, ken Gwangju.
Iti agdama, mapadpadaanan ti resulta ti impeachment complaint kontra iti Presidente.
