Impanamnama ti House Committee on Justice nga ipaayda ti patas a panagtrato kadagiti naipila nga impeachment complaints kontra kenni Vice President Sara Duterte kas iti inaramid dagitoy iti dua nga impeachment complaints a naipila kontra kenni President Ferdinand “Bongbong” Marcos, Jr.
Iti pannakiuman ti Bombo Radyo kenni Baguio City Rep. Mauricio Domogan a nagserbi kas vice chair ng Justice Committee, impanamnamana a dumalan iti kaskenan a proseso dagiti reklamo kontra iti bise presidente.
Innayonna nga adalen a nalaing ti komite ti amin nga linaon dagiti impeachment complaints manipud kadagiti grounds for impeachment, forms, ken supporting evidence a posible a ipresentar dagiti mammanday-linteg a nangi-endorso iti nasao a reklamo.
Impettengna a nu makitada nga umdas ti porma ken substance dagiti reklamo, dagus a maiyuman daytoy iti plenaryo.
Nupay kasta, kinunana nga saan a nadagsen dagiti naipila a reklamo ken posible a maibasura metlaeng dagitoy kas iti napasamak kadagiti impeachment complaints kontra kenni President Ferdinand Marcos, Jr.
Iti agdama, talon ti naiyuman iti komite kontra kenni Vice President Sara. // Bombo Karen Calpoe Sapirao
