BAGUIO CITY – Inkalintegan ni City Administrator Engr. Bonifacio dela Peña a pagrebbengan dagiti hotels ken accomodation establishments ti panakaipatungpal ti No vaccine, No Entry kadagiti miembro ti Hotel and Restaurant Associations in Baguio (HRAB) ditoy siudad.
Iti interview ti Bombo Radyo Baguio, kinunana a pagrebbengan dagiti establishimento nga ipatungpal dagiti pagalagadan nga intuding ti gobierno nangruna ti National Task Force against COVID19 kabayatan ti operasionda kabayatan ti pandemya.
Sigun kenkuana, pammilin ti nasional a gobierno ti panakaipangruna dagiti fully-vaccinated isu’t gapuna a nasken nga agtulnog dagiti establishimiento dagiti polisiya.
Inayonna pay ti panakailikagum ti regular testing kadagiti saan a nabakunaan nga empleyado.
Maipalagip a nangrugi idi pay Enero 1 ti implementasion dagiti sumagmamano nga hotel ken restaurant iti Baguio City ti No Vaccine, No Entry Policy ditoy siudad.
Kabayatana, naksayan manen ti aldaw ti trabaho dagiti sumagmamano nga empleyado kadagiti sumagmamano nga hotels ken restaurants ditoy Baguio City.
Sigun Pinero, saanda a nagkessay iti empleyado ngem nagkessayda iti aldaw ti panagtrabaho dagitoy.
Kinunana a dumanon laengen iti uppat nga aldaw ti panagtrabaho dagiti empleyadoda iti uneg ti maysa a lawas.
Inlawlawagna a gapu ditoy iti bassit a booking ken pamakastrekanda kasaruno ti nalimitaran a bilang dagiti turista a napalubosan a sumrek ditoy siudad.
Inayonna nga adu metten ti kanselasyon kadagiti bookings a naawatda gapu kadagiti napabaroan ken naingetan a restrictions kadagiti dadduma a lugar.
