BAGUIO CITY–Epektibo ita nga aldaw, Agosto 1, ti 15 nga aldaw nga implementasion ti Temporary Transportation Plan ditoy Baguio City kas maibasar iti Executive Order No. 95 ti Baguio Traffic and Transport Technical Working Group.
Iti panakiyuman ti Bombo Radyo kenni Juanario Borillo, dadaulo ti traffic and transport management division ti City Engineering Office (CEO), inlawlawagna iskima ti nasao a plano ti sasaaden ti transportasyon ditoy siudad.
Kinunana nga epektibon kadagiti pribado a lugan ti Baguio City Number Coding Scheme kas nailanad iti City Ordinance Numbered 01 s. 2003.
Nupay kasta, mailaksid iti number coding dagiti Health workers ken miyembro ti Baguio City Contact Tracing Team, dagiti uniformed personnel, service providers; utility services ti danum, elektrisidad, telecommunications ken waste management kasta met dagiti indibidual nga otorisado ti local COVID-19 IATF.
Dinakamatna a nailaksid met iti temporary number coding scheme dagiti parapubliko a jeep no sadino mabalinda latta nga agbiyahe manipud alas-5 ti agsapa agingga’t alas-10 ti rabii, Lunes agingga’t Domingo, iti 50% a kapasidad dagiti pasahero.
Posible met a manayonan ti unit dagiti lugan nga agbiyahe ditoy siudad depende iti demand dagiti pasahero.
Kabayatana, agtaltalinaed ti ban time dagiti cargo ken delivery truck iti ruar ti Central Business District a mangrugi iti alas-6 ti agsapa agingga alas-9 ti agsapa ken alas-4 ti malem agingga alas-9 ti rabii.
Iti met masakupan ti CBD, mangrugi ti ban dagiti truck iti alas-6 ti agsapa agingga alas-9 ti rabii.
Mabalin met nga agoperate dagiti taxi iti 24 oras manipud alas-6 ti agsapa agingga’t alas-6 ti agsapa iti bigat ngem kasapulan latta a masurot ti temporary number coding scheme.
Sigun pay kenni Burillo, maipaayan met iti temporaryo a pagparadaaan dagiti motorsiklo ken bisekleta iti sidong ti Modified General Community Quarantine.
Pakairamanan ditoy ti pakabuklan nga stretch ti Lake Drive, sadiay Calderon Street, iti Lapu-Lapu Street, ken kanayunan a parking space dagiti bisekleta sadiay Malcolm Square, Post Office Loop, ken iti City Hall Gate iti sango ti Insular Life Building.
Impalagip pay ti opisial a maitulok lang ti Road side parking iti sakupen ti demarcation lines iti implementasion ti City Ordinance No. 68 series of 2020 a mang-regregulate kadagiti kalkalsada iti Central Business District ti siudad ti Baguio.
Mainaig iti daytoy, nabaliwan metten dagiti loading areas ken staging areas dagiti parapubliko a jeep nga addaan ruta iti plaza wenno iti sentro ti siudad ti Baguio.
Kinuna ni Burillo a paset daytoy ti kampanya ti lokal a gobyerno a panakakissay ti kinailet ti trapiko ken iti panakakissay ti polusyon iti sentro ti siudad.
Kinunana a nailanad iti Executive Order No. 114, series of 2020 nga impaulog ni Mayor Benjamin Magalong nga agserbi a loading area ti Governor Pack Road bayat nga agserbi nga staging area ti Sandico Street para kadagiti ruta iti Baguio Plaza nga agturong iti Mines View, Navy Base, Tiptop, Pacdal Liteng, Lucnab, Maria Basa, Happy Hallow via Country Club ken via Kadaclan ken ti Camp 7.
Dinakamatna pay nga agserbi met a loading area ti Claudio Street bayat nga agserbi nga staging area ti Calderon Street para kadagiti ruta ti Baguio Plaza nga agturong iti San Vicente,Poliwes ken Camp 8.
Innayona nga agserbi kas loading area ken staging area ti Claudio Street para iti ruta a Baguio Plaza-Loakan bayat nga agserbi kas loading area ken staging area ti Otek Street para iti ruta a Baguio Plaza-Kitma.
Sigun pay kenkuana, agserbi kas loading area ken staging area ti Diego Silang para iti ruta a Baguio Plaza-Diego Silang ken ti ruta iti BAL PNR Circle Hillside.
Inyunay-unay pay ni Borillo a nailanad metlaeng a ti pammilin ket bunga ti agtultuloy a panagadal ti Land Traffic and Transportation Management Committee babaen iti Baguio Traffic and Transportation Technical Working Group tapnu mapasayaat ti gunay ti trapiko ditoy siudad ti Baguio.
Kinuna nga epktibo metlaeng ita nga aldaw ti nasao nga iskima.
