MT. PROVINCE – Agtultuloy ti implementasyon ti Bauko, Mt Province Police Station iti programada a “Moving the Youth Towards Peace and Development.”
Sigun kenni Police Executive Master Sergeant Jhon Ryan Kawi, panggep ti programa a mangipaay iti character development ken social awareness kadagiti agtutubo babaen iti youth camp a maipatpatungpal kadagiti nagduduma a pagadalan.
Dagiti sumagmamano nga aktibidad iti nasao a youth camp ket pakairamanan iti basic life support training, diskusyon iti anti-insurgency, violence againts women and children (VAWC), drug abuse and prevention, mental health awareness ken daduma pay.
Ti nasao a youth camp ket panggepna a suruan ken pabilgen dagiti estudyante kadagiti kritikal nga isyu a mang-apapektar iti komunidad tapno malapdan dagitoy a mangaramid kadagiti saan nga umno a banag.
Impetteng met ti Bauko Municipal Police Station ti kinapateg ti disiplina ken responsibilidad dagiti agtutubo nangruna iti kotribusyonda iti pagdur-asan ti maysa a komunidad.
Iti kaudian nga implementasyon ti nasao nga programa, daytoy ket nakipaseyan dagiti 178 a Grade 12 students no sadino addaan daytoy iti tema a “Youths of today, leaders of tomorrow.”
Kabayatanna, agtultuloy ti nasao a programa babaen iti tulong dagiti school head’s, dagiti mannursuro, ken nagannak tapno mas mapabileg pay dagiti agtutubo iti nasao a munisipyo.//BLNC Mezreel Luis
