BAGUIO CITY – Napirmaan ti katulagan para iti implementasyon ti Binhi ng Pagpapala Program iti nagbaetan ti Department of Agriculture – Cordillera ken ti Police Regional Office – Cordillera (PROCOR) para iti panakaipasigurado ti umdas a suplay ti taraon kadagiti nasusulinek a lugar iti rehion Cordillera.
Supsuportaran ti Binhi ng Pagpapala program ti Plant Plant Plant Program wenno ti Ahon Lahat, Pagkaing Sapat Kontra COVID-19 a mangipaspasigurado iti umdas a taraon kabayatan ti pandemya.
Napateg pay ti programa iti panakaiyasideg ti panagdur-as kadagiti geographically isolated and disadvantaged areas a maitunos iti kampanya ti gobyerno tapnu magibusan ti local communist armed conflict iti pagilian.
Sagudayen ti programa a dagiti kameng ti Community Affairs Section ti Regional Mobile Force Battalion 15 ti PROCOR ti mangiwaras ti bukel dagiti nateng ken tumulongda iti backyard farming.
Maipangruna dagiti benipisaryo ti Pantawid Pamilyang Pilipino Program ken dagiti pamilya nga adda kadagiti lugar nga adda presensia ti panagrebelde.
Nabukel ti programa kalpasan a nakitaan iti positibo a resulta ti nasao a programa nga immuna nga impatungpal dagiti pulis sadiay Tadian, Mountain Province.
