BAGUIO CITY – Makaaw-awat iti pammabalaw ti Session Road Market Showcase ditoy siudad ti Baguio.
Imbinglay dagiti myembro dagiti assosasyon dagiti agilaklako iti merkado publiko ti siudad dagiti pakaseknanda iti implementasyon ti nasao a market showcase.
Sigun ken Jackie Balawag, dadaulo ti Sari-Sari Section ti Baguio City Public Market, napintas dagiti objective wenno panggep ti panakaipatungpal ti market showcase iti Session Road ken iti Igorot Park iti tunggal aldaw ti Dominggo.
Kinunana a gapu iti daytoy ket saanda a tubtubngaren ti nasao nga aktibidad.
Nupay kasta, inlawlawagna a ti panangbabalawda iti nasao nga aktibidad ket iti lokasyon daytoy.
Sigun kenkuana, asideg unay ti Session Road Market Showcase iti merkado publiko isut gapuna a dakkel ti kompetisyon iti panaglako dagitoy.
Dinakamat pay ni Balawag a gaputa Disyembre ita ket adu dagiti tattao iti sentro ti siudad isut gapuna a saan a rumbeng wenno maiparit kuma a maaramat dagiti kalsada kas paglakuan.
Imbinglayna metlaeng a parikotda ita ti panakailukat ti sabali pay a market encounter iti deppaar ti Igorot Park.
Kinunana a dagiti agilaklako sadiay ket dagiti metlaeng mangsupsuplay kadagiti agilaklako iti City Public Market isut gapuna a maliwliwayan dagitoy nga agited ti suplay.
Inyulitna manen a saanda a kukwestionaran ti market showcase ken market encounter ngem ti kiddawda laeng ket maiyadayo ti lokasyon dagitoy manipud iti City Public Market.
