BAGUIO CITY–Inyunay-unay ni La Trinidad Mayor Romeo Salda dagiti kasapulan a dokumento iti panagturong sadiay dagiti indibidual a maipatungpal mangrugi ita nga aldaw..
Iti interview ti Bombo radyo Baguio, kinunana a kasapulanen a Medical Certificate ken Authority to Travel ti maiparang kadagiti checkpoints.
Sigun kenkuana, agpaut ti baro a pammilin iti las-ud ti dua a lawas.
Kinunana nga imbilin ti Department of Health ti nainget a panagtulnog ti munisipyo iti minimum health standards, pakairamanan ti protocols ti Municipal IATF kas basaran iti maangay nga assessment dagitoy sadiay mainaig iti UK Variant ti COVID-19 a nakastreken iti munisipyoda.
Kabayatanna, inaklon ni Mayor Salda a parikotda ti kinakurang dagiti pulis nga agbantay iti aglawlaw ti munisipyo kasaruno ti implementasyon ti naing-inget a pagalagadan gapu iti iseserrek saiday ti baro a variant ti COVID-19.
Kagiddan iti daytoy ket kiniddawna manen ti kooperasion ti amin a residente sadiay tapnu saan nga ad-adda pay a ngumato iti kaso dagitoy iti COVID-19.
Kabayatana,
Manarimaan paylaeng ti panagadal iti DOH ken ti Philippine Genome Center iti B117 UK Variant ti COVID-19 sadiay La Trinidad.
Kinuna ni Mayor Romeo Salda a nakatuktokda ladta iti aniaman nga update wenno damag manipod iti DOH-Cordillera mainaig iti nasao a kaso.
Manarimaan met ti agtultuloy a contact tracing ken monitoring kadagiti nakapulapol ti nakaptan iti nasao nga variant.
Malaksid iti dayta, impettengna nga awan pay ti local transmission iti munisipyo kas maibasar iti waragawag ni DOH-CAR Regional Director Dr. Ruby Constantino mainaig iti sitwasyon ti UK variant iti La trinidad, Benguet.
Maipalagip nagpositibo iti COVID-19 UK variant ti maysa a 22-anyos a residente ti La Trinidad ken nagpositibo pay ti tallo a direct contact daytoy, no sadino, naisumitiren iti Philippine Genome Center ti specimen ti dua kadagitoy.
