BAGUIO CITY – Tubtubngaren ti Philippine Chamber of Commerce and Industry (PCCI) – Baguio Benguet Chapter ti implementasyon ti Tax Reform for Acceleration and Inclusion (TRAIN) Law wenno ti baro a tax reform program ti agdama nga administrasyon.
Sigun kenni outgoing PCCI – Baguio Benguet Chapter president Modesto Immayaho, dakkel ti epekto ti nasao a linteg kadagiti negosyante nangruna iti pananggatangda kadagiti materyales para iti produktoda.
Kinunana nga imbes a matulungan dagiti marigrigat a Pilipino ket posible pay a rumigat ti panagbiag dagitoy gapu iti panagngato ti presyo dagiti gagatangen a produtko gapu iti pannakaipangato ti excise tax dagitoy.
Dinakamatna nga ita ket sumagmamano kadagiti negosyante ti nangipangina iti tagilakoda kas kadagiti contruction materials, softdrinks, tabako ken dadduma pay kangrunaan a pagkasapulan ti publiko.
Impettengna pay a tapno saan a maparigat dagiti konsyumer ket rumbeng laeng a maipangato ti sweldo dagiti mangmanged.
Kagiddan iti daytoy, iyap-apela ni Immayaho ti nainget a panangmonitor ti Department of Trade and Industry kadagiti negosyante tapnu awan kadagitoy ti agabuso ken mangipatungpal ti overpricing iti produkto dagitoy.
