BAGUIO CITY – Kinasaritan ni City Mayor Mauricio Domogan dagiti kameng ti Baguio City Police Office a saanda pay nga agipapaay iti ticket kadagiti aglabsing iti truck ban kasaruno ti sangapulo nga aldaw a suspensyon ti nasao nga ordinansa.
Kinunana a binagaanna dagiti pulis a pakdaaran wenno bagaanda dagiti motorista seknan iti truck ban ordinance iti siudad ti Baguio.
Inaklonna met a saan a nakonsulta ti grupo dagiti truckers nga agtataud iti probinsya ti Benguet mainaig iti nasao a banag.
Dinakamatna nga awan ti parikot kadagiti truckers iti truck ban iti agsapa ngem tarigagayda a maamyendaran ti truck ban iti malem gaputa daytoy ti oras a panagruar dagiti vegetable delivery truck.
Innayunna nga insingasingda ti pannagna dagiti truck iti Pico-Lamtang-Irisan-Sta Lucia road ken rumuar iti Marcos Highway ngem marigatan dagiti kargado a truck a sumang-at iti Pico road.
Sagudayen ti City Ordinance No. 5 series of 2017 a saan a mabalin a dumalyasat, agparada, agkarga wenno agdiskarga dagiti heavy equipment vehicles, trailers, dump trucks ken dadduma a freight trucks iti kalsada ti siudad manipud alas sais ti agsapa agingga iti alas nuebe ti agsapa, ken alas kwatro ti malem agingga iti alas nuebe ti rabii.
Dagiti cargo delivery trucks ket mabalin nga agkarga wenno agidiskarga iti produkto iti central business district area manipud alas nuebe ti rabii agingga iti alas sais ti agsapa.
Dagiti aglabsing ket mamulta iti duaribu a pisos agingga iti limaribu a pisos.
