BAGUIO CITY – Makitkitan ti lokal a gobierno ti Baguio a mangrugin ti panagrekober ti siudad manipod iti COVID-19.
Sigun kenni Baguio City Mayor Benjamin Magalong, epektibon met ita nga aldaw, Marso 1 ti panakaipasidong ti siudad iti alert level 1 agingga inton March 15 iti agdama a tawen.
Nupay kasta, kinunana nga in-inot nga ipatungpal ti siudad dagiti guidelines tapno makontrol ti sitwasyon ti COVID-19.
Impettengna a kasapulanen ti siudad nga agsubli iti baro a normal ngem nasken latta a masurot dagiti minimum public health standards.
Imbinglay ti mayor a nakiyumanen daytoy kadagiti pribado sektor ken iti sektor ti negosio para iti panagrugi ti panagrekober dagitoy manipod iti COVID-19 tapno masubbot metten ti nagbalin a lugi dagitoy.
Kabayatanna, mailukat ti siudad iti sidong ti alert level 1 ngem agdependar latta dagiti guidlines a maipatungpal kadagiti nagduduma nga establishimento ditoy siudad.
Maipatungpal latta ti panagrehistro dagiti turista iti visita.baguio.gov .ph ngem mapagsasaritaan pay nu mabalin ti pagalagadan iti panag-triage dagitoy.
Mapalubosan met dagiti establishimento a mangipatungpal iti bukodda nga guidelines malaksid iti intuding wenno kidkiddawen ti gobierno kas iti 75% operating capacity indoor establishments ken 100% capacity iti outdoor.
