BAGUIO CITY – Nakasaganan ti lokal a gobyerno ti Baguio a mang-ibaw-ing iti imatangda iti panagplano para iti in-inot a panagsubli iti normal dagiti nagduduma a sektor iti siudad kalpasan ti Enhanced Community Quarantine.
Maipalagip a 12 nga aldaw laengen ti nabatbati sakbay nga agleppas ti Enhanced Community Quarantine iti entero a Luzon nga intunda ti COVID-19 pandemic.
Sigun kenni Mayor Benjamin Magalong, maibasar iti personal a panagadalna ket nailatagen ti siudad ti amin a napateg a sistema a mangaksion iti krisis gapu iti COVID-19 pandemic ken nakasaganan ti siudad para iti post-ECQ plans nga adaptaren ti nasyonal a gobyerno.
Dinakamatna a nasken a kitaen ti siudad ti posibilidad a saanen nga ilaylayon ti nasyonal a gobyerno ti Enhanced Community Quarantine ken maipatungpal ti modified quarantine status tapnu maipalubos ti panagsubli iti normal dagiti dadduma a sektor.
Innayon ti mayor a konsultaenna dagiti sectoral groups tapnu ammuenna ti kapanunutan dagitoy, nangruna dagiti health experts para iti panakabukel dagiti pagalagadan para iti tunggal sektor iti panaglukat manen dagitoy.
Naituding ti taripnong inton Lunes, April 6 para iti nadakamat a pakaseknan.
