BAGUIO CITY – Irekrekomendar dagiti stakeholders ti tourism sector ti La Trinidad, Benguet ti in-inot ken natalged a panakailukat manen ti turismo sadiay nga uray kadagiti laeng lokal a turista.
Iti panakiuman ti Bombo Radyo Baguio, kinuna ni Municipal Tourism Officer Valred Olsim nga iti dua a tawen a panagraira ti pandemya gapu iti COVID-19 ket naadaldan no kasano a maipasigurado ti kinatalged dagiti tattao iti baet ti panagtuloy dagiti aktibidad a mangbiag iti ekonomiya.
Dinakamatna nga idi napalabas a tawen bayat ti lockdown ket maysa ti La Trinidad kadagiti immuna a naglukat ti turismo para kadagiti lokal a turista.
Inlawlawagna nga impasidongdan iti panagsanay dagiti stakeholders kadagiti tourism sites ti munisipyo, nangruna iti implementasyon ti safety protocols kontra iti COVID-19.
Innayonna a napateg ti panakailukat ti turismo gaputa adu dagiti nakadependar iti sektor ti turismo kas kadagiti adu a mannalon ti strawberry, dagiti agilaklako kadagiti pasalubong ken mula, dagiti agipoproseso ti strawberry products ken dadduma pay.
Impettengna a saan laeng a para iti panakabiag ti ekonomiya ti panakailukat dagiti tourist sites ngem ketdi, makatulong metlaeng iti mental a kasasaad dagiti sumarungkar kadagitoy.
Sigun pay kenni Olsim, ti panakailukat ti turismo ti maysa kadagiti recovery plan tapnu agsubli ti nasaranta nga ekonomiya ti munisipyo manipud iti nagbalin nga epekto ti agdama a pandemya.
Kabayatanna, agtultuloy ti panakabakuna kontra iti COVID-19 dagiti tourism workers sadiay La Trinidad, Benguet kas panagsagana dagitoy iti panaglukat ti turismo ti munisipyo.
Kinuna ni Olsim nga iti agdama ket 70% paylaeng kadagiti stakeholders ti tourism sector sadiay ti nakaawat ti umuna a dose ti bakuna kontra iti COVID-19.
Sigun kenkuana, adu a tourist sites sadiay ti addaan kadagiti staff a nabakunaanen kontra iti COVID-19.
Innayonna a gapu iti daytoy, nagsuratda kenni Tourism Secretary Bernadette Puyat ken nagkiddawda ti alokasyon ti kanayonan a bakuna.
Dinakamatna pay nga adbokasiya met laeng ti Department of Tourism ti panakabakuna dagiti amin nga agtatrabaho iti sektor ti turismo tapnu natalged dagitoy ken dagiti agbalin a kliyente dagitoy.
Iti agdama, dumanon iti 13 a tourist sites sadiay La Trinidad ti bambantayan dagitoy ken 90% kadagitoy ti open air.
Kabayatanna, dinakamat ni Olsim a posible nga agtaripnong manen ti Municipal IATF ti La Trinidad ita a lawas ken aniaman a makedngan a gasat ti kiddaw a panakailukat ti turismo sadiay ket irespeto dagitoy.
Nupay kasta, mangnamnamada latta a mapatgan ti kiddawda ken mailukat ti turismo sadiay nga uray kadagiti lokal a turista.
