BAGUIO CITY – Naibalud ti maysa nga ina kalpasan a ginandatna ti mangiserrek iti marijuana iti uneg a mismo ti Baguio City Jail Male Dorm.
Nabigbig ti suspek a ni Manuela Calara, nga ina ti drug suspect a ni Michael Calara a kinemmeng dagiti otoridad itay laeng nabiit.
Sigun kenni Jail Officer 2 Eric Palinos, nakitana ti maysa a pakete ti marijuana iti uneg ti rubber shoes ti suspek idi sinukimatna dagiti kagawaan daytoy.
Nainget a pinaglibakan ti suspek a tagikuana ti nasao a kontrabando ken kinunana a saanna nga ammo nga adda ti marijuana a naikabil iti sapatos.
Naipasidong ti suspek iti drug test tapno maammuan nu agar-aramat daytoy iti iligal a droga.
Maipalagip a nakemmeg ti anak ti suspek a ni Michael Calara iti maysa a drug buy bust operation nga impatungpal ti City Anti-Illegal Drug Unit ngem limmaban daytoy kadagiti pulis a nangitunda iti pannakatay ti maysa a maintenance crew a napuntaan iti naiyaw-awan a bala.
