BAGUIO CITY – Naipasidong iti psychiatric test ti ina a nangibaot ken nangibelleng iti mismo nga anakna iti maysa a kanal sadiay Purok 3, Irisan, Baguio City idi napalabas a lawas.
Sigun kenni Dr. Rodrigo Jaime Leal, medico legal chief ti Scene of the Crime Operative (SOCO) – Baguio, ti nasao nga ina ket makapaspasar iti “major depressive disorder” a posible a resulta ti sexual violence.
Kinunana a kaaduan kadagiti makapaspasar iti nasao a sakit ket dagiti biktima ti panagrames.
Kabayatanna, inruar metten ti SOCO-Baguio ti resulta iti otopsiya ti bangkay ti maladaga.
Kinuna ni Dr. Leal a ‘bleeding secondary to blood truamatic injury’ ti rason iti ipupusay ti maladaga kalpasan a naibaot ken naibelleng iti maysa a kanal.
Maibasar iti resulta, nagsagrap ti maladaga iti dakkel a sugat iti ulona ken nabettak pay ti bangabanga daytoy malaksid a nagsagrap ti maladaga iti general infection.
Innayonna a dumanon laeng iti 31-32 a lawas wenno katukad ti pito a bulan ti maladaga idi naipasngay daytoy a maibilbilang a premature.
