Impakaammo ni US President-elect Donald Trump a mapasamak ti inagurasyon daytoy inton January 20 idiay United States Capitol Rotunda gapu paylaeng iti pangta ti nalem-ek unay a temperatura sadiay.
Sigun kenni Trump, ilukatda ti Capital One Arena bayat ti inagurasyon para iti live viewing.
Sigun met iti Joint Congressional Committee on Inaugural Ceremonies, masapol a raemenda ti kiddaw ti President-elect ken ti Presidential Inaugural Committee daytoy para iti nasao a seremonya.
Gapu iti dayta, maysa a makitkita a parikut iti agadama nu kasano a maakomodar ti publiko a dumar-ay iti nasao nga inagurasyon.
Kabayatanna, mangisagsagana met dagiti otoridad iti sabali pay a plano kagiddan iti naikeddeng a panakaangay iti inagurasyon indoor a mabalin a makaapektar iti nabukel a security plans.
Ti inagursyon ni Trump ket manamnama a dar-ayan iti rinibribu a ticketed guests ken isaganaan iti agarop 25,000 a law enforcement ken military personnel.
