Inwaragawag ni Justice Secretary Jesus Crispin Remulla a posible nga adda ti pakainaigan dagiti sumagmamano nga indidibidual a karaman iti death squads ti napalabas nga administrasyon iti kaso seknan iti e-sabong wenno online cockfights kabayatan ti pandemic.
Nupay kasta, kinunana a kasapulan pay ti nalawlawag nga imbestigasyon tapno mapaneknekan daytoy.
Sigun kenni Remulla, adda dagiti indibidual a posible a karaman kadagiti suspek iti pammapatay iti drug war ken e-sabong.
Innayon pay ti nasao nga opisial nga adda dagiti insidente a naikonektar ti dua a nasao a kaso.
Maysa ditoy ti pannakarestar dagiti drug suspects idiay Meycauayan a naduktalan nga adda ti pakainaiganda iti e-sabong operations.
Kabayatanna, kinuna ni Remulla nga agparparang a ti Taal Lake ti agserserbi a lugar a pakaibelbellengan dagiti bangkay ti tao.
Maipalagip a narekober dagiti otoridad ti nakasako a tulang iti Taal Lake no sadino, kinuna ni Philippine National Police chief Police General Nicolas Torre III a dadduma kadagiti narekober ken tulang ti tao.
