Maob-obserbaran paylaeng dagiti indibidual a mangisaysayangkat ti panagmasahe, “fortune telling”, ken panag-“tattoo” iti aglawlaw iti Burnham Park, Baguio City.
Iti interview ti Bombo Radyo iti kameng ti Visitors Information Center ken Department of Tourism accredited tour guide, kadawyan a maob-obserbaranna nga agkukuyog dagiti indibidual a mangisaysayangkat ti nasao a serbisio iti malem wenno rabii iti oras ti alas siete.
Kadawyan a rumrumuar dagitoy kas bunggoy wenno grupo nangruna nu long weekends ken holiday season gaputa adu ti sumangsang-at a bisita iti siudad ti Baguio.
Nupay kasta, pagyamyamanan ti nasao nga indibidual gaputa adda dagiti opisial ti Public Order & Safety Division, kameng ti CEPMO ken Philippine National Police nga agrikrikus a mangsita kadagitoy.
Ngem aklonenna a makitkitana manen dagitoy kalpasan ti sumagmamano nga aldaw a nangisaysangkat manen ti nasao a serbisio.
Maipalagip nga itay laeng kallabes, impawil ti City Environment and Parks Management Office (CEPMO) ti personal services a kas ti panagmasahe, “manicure,” panag-“tattoo”, ken “fortune telling” kasta metten ti iligal a “vending” iti Burnham Park ken dadduma pay a parke iti siudad ti Baguio.
Daytoy ket babaen ti pammilin ni Baguio City Mayor Benjamin Magalong nu sadinno, imbilinna ti nainget a panag-monitor kadagiti iligal nga aktibidad kalpasan a nakaawatda ti report a ngimmato ti insidente ti panagtakaw nga adda pakainagan ti maysa nga indibidual a mangipapaay ti “massage services.”
Nagballaag daytoy iti publiko a liklikan ti iligal nga aktibidad ken dagos nga ireport daytoy ti Public Order and Safety Division, iti CEPMO, wenno iti maseknan nga opisina.
Kabayatanna, iti phone interview ti Bombo Radyo iti maysa nga opisial ti City Environment and Parks Management Office (CEPMO), kinunana a gapu iti addang nga ar-aramiden ti opisinada kaduada ti Public Order and Safety Division, ken Philippine National Police, bimmaba ti bilang dagiti indibidual a mangisaysangkat ti nasao a serbisio, nu idilig iti napalabas a bulan.
Manarimaan metten ti profiling ti opisina ti City Environment and Parks Management Office (CEPMO) kadagiti mangisaysayangkat ti serbisio tapno maamuan ti impormasion ken bilang dagitoy.
Imbinglayna a maad-adalen ti posible a lugar a naituding para kadagiti nadakamat a serbisio tapno ad-adda a nasayaat ti buyada.
