BAGUIO CITY – Naipasidong iti re-swabbing ita nga aldaw ti 22-anyos sadiay La Trinidad, Benguet a nagpositibo iti UK variant ti COVID-19 ken dagiti direct contact dagitoy, pakairamanan ti pamilyana.
Imbinglay daytoy ni La Trinidad Mayor Romeo Salda iti panakiyuman ti Bombo Radyo Baguio kagiddan ti panangdakamatna a naisumitiren sadiay Philippine Genome Center ti specimen ti dua a direct contacts ti nasao a pasyente a nagpositibo met iti COVID-19.
Nupay kasta, kinunana a maysa pay a 15-anyos a direct contact ti nasao a pasyente ti nagpositibo metlaeng iti COVID-19.
Sigun kenkuana, nakaruaren ti nasao a pasyente kalpasan a nakompleto ti mandatory quarantine daytoy bayat a ti dua a direct contact daytoy a nagpositibo iti COVID-19 ket addada iti Benguet General Hospital.
Innayonna nga idi pay January 6 a na-swab test ti nasao a pasyente ngem idi laeng kalman a naipaka-ammo kadakuada ti resulta.
Manarimaan metten ti contact tracing iti pamilya ti pasyente ken sumaruno dagiti katrabahuan daytoy iti pagserserbianna a kompanya ti dry goods, pakairamanan dagiti direct contacts dagiti dua a naakaran a kapamilya daytoy.
Suksukimatenda metlaeng ti posible a nakaalaan ti pasyente iti UK variant ti COVID-19 nangruna ta awanan daytoy ken ti pamilyana iti travel history paruar iti pagilian.
Naamuan nga indiaya metten ni Contact Tracing Czar ken Baguio Mayor Benjamin Magalong ti tulongda iti La Trinidad ken iti Benguet para iti contact tracing.
Kabayatanna, nangbukel ti Municipal IATF ti La Trinidad, Benguet iti resolusyon a mangitudtuding kadagiti nairtengan ken baro a pagalagadan a nasken a suruten dagiti umili sadiay.
Kinuna ni Mayor Salda a karaman kadagiti maipatungpal ti panaka-istrikto manen ti border checkpoint tapnu masukimat amin a sumrek sadiay La Trinidad.
Innayonna a mapabaruan ti curfew hours sadiay ken maisurot iti alas sais iti agsapa agingga alas otso ti rabii nga operasyon dagiti business establishiment iti ili.
Agbalin met a 50% ti operating capacity dagiti accomodations iti La Trinidad bayat a maipawil to ti iruruar dagiti 15-years old nga agpababa ken dagiti 65-years old nga agpangato iti entero a bulan ti Pebrero.
Naituding a sakbay ti social gathering ket nasken nga agala dagiti maseknan iti permit manipud iti barangay hall ken iwanwan dagiti barangay officials ti aktibidad.
Inyunay-unayna met nga implementarda pay dagiti walo a protocols kontra iti COVID-19 ken kalpasan ti dua a lawas ket obserbaranda no bumaba ti kaso ti COVID-19 sadiay ngem no awan ti panagbaliw ket kiddawenda manipud iti Regional IATF ken National IATF ti panakaipasidong ti La Trinidad iti General Community Quarantine.
