Saan pay mabalin a pilaan iti kaso a premature campaigning dagiti agngayangay agingga a saan pay nadanon ti umuna nga aldaw iti campaign period a mangrugi inton February 10 para iti national position, ken inton March 28 para iti local position.
Iti panakiuman ti Bombo Radyo kenni Atty.George Erwin Garcia, Chairperson iti Commission on Elections(COMELEC),inlawlawagna a saan pay a maibilang a kandidato ti maysa nga indibidwal kalpasan ti panangipila daytoy iti Certificate of Candidacy(COC).
Daytoy ket maitunos iti nagbalin a pangngeddeng ti Korte Suprema iti Rosalinda A. Penera vs. Commission on Elections and Edgar T. Andanar, ken iti Section 15 iti RA 8436, a naamyendaran iti Section 13 iti RA 9369.
Gapu iti dayta, nawaya paylaeng dagitoy a makialamano wenno mangidisplay iti rupada kadagiti kalkalsada ken daduma pay.
Malaksid iti dayta, saan pay a mairaman iti Statement of Contributions and Expenditures ti magastos dagiti nakaipilan iti Certificate of Candidacy(COC) kaspangarigan adda ti ipatungpal dagitoy nga aktibidad gapu ta saanda pay maibilang a kandidato.
Kagiddan dayta,impeksa ti opisyal a nupay saanda nga umanamong iti daytoy ket awan ti maaramidanda.
Iti sabali a bangir, impalagip ni Atty. Garcia a nangipaiyulog dagitoy iti resolusyon idi napan a lawas a temporaryo a mangipawil iti panakaisayangkat iti plebesito ken special elections referendum gapu iti panagsagana iti 2025 Midterm Elections.//Bombo Rob Dominguez
