BAGUIO CITY – Nababbaba ti inflation rate ti Cordillera iti January 2021 no idilig iti national level.
Iti interview ti Bombo Radyo Baguio, kinuna ni National Economic and Development Authority (NEDA) – Cordillera OIC Regional Director Stephanie Christiansen nga iti January 2021 ket 4.0% ti inflation rate ti Cordillera a nababbaba no iti 4.2 average inflation rate iti national level.
Inlawlawagna a ti inflation rate ket ti kapartak ti panagngato wenno panagbaba ti presyo dagiti gagatangen iti partikular a panawen.
Sigun kenkuana, ti nangipangato iti inflation rate ti rehion ket ti presyo ti karne ti baboy gapu iti African Swine Fever.
Kabayatanna, imbinglayna nga iti April 2020 a kagiddan ti Enhanced Community Quarantine iti Luzon ket nailista ti 25.3% nga unemployment rate iti Cordillera ken maysa daytoy kadagiti kangatuan iti entero a pagilian.
Sigun kenni Christiansen, katukad daytoy ti nasurok 174,000 nga indibidual iti Cordillera a naawanan ti trabaho.
Maibasar iti rekord, umuna a nakailistaan ti panagkissay iti empleyado ket ti manufacturing sector a sinaruno dagiti accommodation establishments ken food industry ken ti wholesale ken retail industry.
