BAGUIO CITY–Imbilinen ni Mayor Victorio Palangdan ti panangipatungpal dagiti barangay officials sadiay Itogon, Benguet iti information drive kadagiti masakupan dagitoy kalpasan nga indeklara ti Mines and Geosciences Bureau (MGB) nga 184 nga ektarya ti Itogon ket ‘high risk landslide-prone area’.
Immuna iti daytoy, nangisayangkat ti MGB iti komprehensibo a geohazard assessment ken naduktalanda dagiti sinyales ti panagreggaay ti daga iti sumagmamano a barangay ti Itogon.
Nabigbig a ‘landslide-prone areas’ ti Sitio First Gate a nakapasamakan ti dakkel a panagreggaay ti daga idi September 15, ti Sitio Malasin ken Sitio Keystone iti Barangay Ucab.
Naduktalan pay nga adda ti aktibo a landslide sadiay Sitio Keystone, partikular iti nakaisaadan ti processing center dagiti nabirbirukan a bangkay manipud Level 070 Sitio Firstgate.
Nabigbig pay kas ‘landslide-prone areas’ sadiay Barangay Virac ti Sitio Bubon, Sitio Batuang, Sitio Balatok ken Sitio City Limit nangruna ta sadiay a napasamak ti dakkel nga abot idi 2015 a nakatnagan ti nasurok lima a babbalay; iti Sitio Goldfield ti Poblacion ken iti Barangay Ampucao.
Gapu iti daytoy, inrekomendar ti DENR – Cordillera ti pwersado a panagbakwit kadagiti umili kadagiti nasao a sitio a nabigbig a ‘landslide-prone’ ken ti panakaimplementar ti relokasyon dagiti apektado nga umili iti kabiitan a panawen tapnu maliklikan dagiti insidente ti panagreggaay a pakapukawan ti biag ken sanikua.
Dinakamat ni DENR – Cordillera regional director Ralph Pablo a tallo laeng a porsiento iti Itogon ti natalged a mabalin a pagbalayan.
Inwaragawag met ni Mayor Palangdan nga adda ti dayalogo dagiti amin nga umili ti Itogon tapnu maipaka-awat kadagitoy a saanen a mabalin ti panangipasdek ti balay kadagiti napepeggad a disso.
Naideklara pay a saanen a mabalin a pagbalayan ti Level 070, Firstgate, Sitio Colombia, paset ti Sitio Luneta ken Sitio Simot-simot sasdiay Itogon.
