BAGUIO CITY – Dumanon ita iti P28.42-M ti inisyal a gatad ti danyos iti sektor ti agrikultura sadiay Abra kasaruno dagiti nailista a panagreggaay ti daga ken napasaran a panaglayos nga epekto ti nepnep.
Sigun kenni Dr. Expedito Villaruz, Abra Provincial Agriculturist, dumanon iti P23.358-M ti danyos iti produksion ti mula a pagay kadagiti talon kadagiti munisipyo ti Lagayan, San Juan, La Paz, Lagangilang, San Quintin, Dolores, Bangued ken Pidigan.
Bukbuklen daytoy ti agarop 3,000 a bilang dagiti mannalon a naapektaran iti nasao a sasaaden ti panawen.
Nailista met met ti P1.90-M nga inisyal a danyos kadagiti mula a mais sadiay Bangued, Dolores, Lagayan, Licuan-Baay ken San Juan a nagresulta iti panaka-apektar dagiti 111 a mannalon.
Iti met livestock, dumanon iti P1.780-M ti danyos kadagiti nuang, baka, kalding, manok ken baboy sadiay munisipyo iti San Isidro, Langiden, La Paz, Lagayan, Tubo ken Pidigan.
Iti report ti Bureau of Fisheries and Aquatic Resources, adda ti nailista a partial damage a dumanon iti P1.371-M kadagiti munisipyo ti Bucay, Danglas, Lagayan, Langiden, La Paz, San Juan, San Isidro, Tayum, Tineg, Lagangilang, Pilar, Dolores ken Villaviciosa.
Inlawlawag ni Villaruz nga intunda daytoy ti panakadadael dagiti fishing net wenno dagiti kagawaan iti panagkalap kas iti sigay ken barekbek.
