BAGUIO CITY – Nakasaganan ti Baguio City para iti panakailukat ti commercial flights sadiay Loakan Airport kasaruno iti panakalpas dagiti inisyal a panagsagana ti Civil Aviation Authority of the Philippines (CAAP) tapnu marisut ti pakaseknan iti kinatalged dagiti commercial aircrafts nga agbiahe sadiay.
Sigun kenni Engr. Januario Borillo, dadaulo ti Traffic and Transportation Management Division ti City Engineering Office (CEO), maipatungpal ti survey kadagiti lote a maikkat para iti maikalikagum a bypass road iti laud a paset ti eropuerto.
Kinunana a babaen iti daytoy ket marugian ti permanente a panakairikep ti eropuerto kadagiti motorista.
Dinakamatna a madutukan ti Baguio City Police Office – Station 4 ken ti Aviation Security Group iti deppaar ti Kias Road kabayatan dagiti commercial flights tapnu makontrol ti panaggaraw ti trapiko.
Malaksid iti dayta, adda ti mabukel a probisyon para iti mandatory a panakaimuntar ti traffic bar ken signages iti kalsada partikular iti murdong ti Runway 27.
Temporaryo met a mangipaay ti CAAP iti temporaryo a movable stop bar kabayatan iti panagaramid ti CEO iti permanente a traffic bar.
Pinaad metten ti City Environment and Parks Management Office dagiti kaykayo a masarakan iti uneg ti runway strip ken take-off lane pakairamanan ti asideg iti Runway 27 tapnu maipasigurado iti kinatalged ti panagdisso ken panagtayab dagiti eroplano iti eropuerto iti kanito a naan-anay a mailukat ti commercial flights sadiay.
Sigun pay kenni Borillo, mangipaay ti Bureau of Fire Protection (BFP) iti fire trucks a maipwesto iti eropuerto bayat ti panakauray ti permanente a fire trucks nga ipaay ti CAAP.
Nupay kasta, kinunana a manarimaan paylang iti panangitrabaho ti lokal a gobyerno iti possible a panakaiyakar wenno demolisyon dagiti iligal nga istruktura a masarakan iti buffer zone ken runway strip ti Loakan Airport.
