BAGUIO CITY – Agtultuloy ti innaldaw a panagbaba ti kaso ti COVID-19 sadiay La Trinidad, Benguet.
Iti interview ti Bombo Radyo Baguio, kinuna ni Mayor Romeo Salda a resulta daytoy ti panagbakunada kontra iti nasao a sakit, ti panakaipasidong iti swab test dagiti stakeholders ken dagiti nakapulpulapol dagiti nagpositibo iti COVID-19 sadiay.
Dinakamatna met nga adun dagiti nagpalista a kayatda ti agpabakuna kontra iti COVID-19 ngem bassit ti bakuna a naawat ti munisipyo.
Sigun kenkuana, nasurok laeng iti 4,900 doses ti pakabuklan a bakuna a naawat ti La Trinidad bayat a 1.15 percent ti nakakompleto iti bakunada sadiay nga adayo a nababa no idilig iti target population dagitoy a nasurok 90,000 nga indibidual.
Mangnamnama met daytoy a manayonan ti bakuna kontra iti COVID-19 a naituding a sumangpet sadiay La Trinidad gaputa adda ti kiddaw ti Caretaker Congressman ti Benguet sadiay national government para iti panakanayon ti bakuna a maipaay iti probinsia.
Kabayatanna, dinakamat ni Mayor Salda a kadagiti returning OFWs, mabalin nga ag-quarantine ti maysa nga OFW sadiay Manila iti agingga sangapulo nga aldaw ken busbusen daytoy ti nabatbati nga uppat nga aldaw iti Strawberry Hotel ti La Trinidad.
Kinunana a ma-swab manen ti maseknan nga OFW kalpasan ti uppat nga aldaw ken ti resulta ti pagbasaran no mabalinen daytoy nga agawid.
Sigun kenkuana, babaen iti baro a pagalagadan ket maliklikan ti dagus a panagawid dagiti OFWs iti babbalayda.
Iti agdama, dua laeng ti OFWs nga adda iti nasao a hotel ti munisipyo.
