BAGUIO CITY – Maipangaton ti minimum wage wenno sweldo dagiti trabahador iti pribado a sektor ditoy rehion Cordillera iti P20-P30 tunggal aldaw.
Nailanad iti naaprobaran a baro a wage order nga RB-CAR-19 idi July 20, 2018 a ti P20-P30 tunggal aldaw ket mainayon iti basic pay dagiti minimum wage earners ken saan nga iti Cost of Living allowance (COLA).
Sigun iti Regional Tripartite Wages and Productivity Board (RTWPB) – Cordillera, inkonsiderada ti panakainayon ti agdama a P15 a COLA tunggal aldaw iti basic pay isut gapuna nga iti baro a wage order ket kaipapananna nga awanen ti COLA.
Kinuna ni RTWP-Cordillera Secretary Augusto Aquillo nga adda pay ti agarup nasurok P6 tunggal aldaw a mainayon kadagiti dadduma a monetary benefits dagiti minimum wage earners kas iti 13th month pay, holiday pay, service incentive leave, premium pay ken maipangato ti employers’ contribution iti SSS ken iti PhilHealth.
Kinunana nga iti pakabuklan, manayonan iti P26-P36 ti innaldaw a sweldo dagiti minimum wage earners iti pribado a sektor ditoy rehion.
Kaipapananna nga agbalin a P326-P336 ti innaldaw a sweldo dagiti adda iti pribado a sektor manipud iti agdama a ₱270-₱300 tunggal aldaw.
Nupay kasta, saan a karaman iti baro a wage rate dagiti kasambahay, dagiti agtatrabahpo kadagiti barangay micro-business enterprises ken dagiti indibidual a mangipapaay ti personal service kas kadagiti drivers.
Kangrunaan a naikonsidera iti baro a pammilin para iti panakaipangato ti sweldo ket ti resulta ti panagadalda iti socio-economic condition ti rehion ken dagiti resulta dagiti konsultasyon nga insaysayangkatda iti nagduduma a paset ti Cordillera.
Ag-epekto ti baro a minimum wage rate ditoy rehion kalpasan ti 15 days apaman a maipablaak ti baro a wage order iti maysa a pagiwarnak ditoy lokalidad inton Dominggo, August 5.
