Nadangran ti innem nga indibidual kalpasan a napasamak ti panagbettak ti maatap nga air compressor iti Tayuman Street corner Dagupan Street sadiay Manila idi malem ti Domingo, Agosto 3.
Sigun iti Explosive Ordnance Division (MPD-EOD) ti Manila Police District, nabirokan ti dismantled air-conditioning compressor iti lugar a maatap a nakaigapuan ti panagbettak.
Dagus a naitaray dagiti biktima kadagiti ospital babaen kadagiti emergency responders manipud iti Bureau of Fire Protection (BFP), Philippine National Police (PNP), ken local rescue units.
Dua kadagiti biktima ti naiturong iti Tondo General Hospital, bayat a ti maysa ket naipan iti Jose Reyes Memorial Medical Center.
Saan pay a nairuar ti nagan ken kasasaad dagiti biktima.
Kabayatanna, nabalakadan ti publiko a liklikan ti agturong iti nasao a lugar bayat nga agtultuloy ti imbestigasion.
